كيفاش يمكن ليا نحدد الأهداف الشخصية؟
بزاف ديال الناس كا يعتارفوا أنهم ما عندهمش أهداف مرسومة في حياتهم ولا مكتوبة كا يرجعوا ليها مرة مرة ، تحديد الأهداف عملية قوية كيقوم بها العقل بتفكير في رسم مستقبل مثالي ، فهي طريقة لتحفيز تحويل الأهداف من رؤية للمستقبل إلى واقع . الأهداف نوعين: الأول كيكون قصير المدى و كتبغي تحققوا في أقرب وقت, و الثاني هدف بعيد المدى و كيحتاج لتحضير و الوقت .
عملية تحديد الأهداف كتساعدك أنك تختار لفين باغي توصل بحياتك؟ فهي كاتساعدك على تحديد ما هو مهم بالنسبة لك في حياتك و لي عند علاقة بنجاحك و بالتالي هادشي كايحفزك على الإجتهاد حيث كايعطيك الثقة في النفس .
كيفاش نبدا في تحديد الأهداف الشخصية ؟
أولا خاصك تبدا بخلق الصورة الأولية و لي تكون كبيرة و شاملة لأهدافك الكبرى ، من بعد تبدا تقسم هاذ الأهداف لأهداف صغيرة وحدة من مورا وحدة بحيث أنه إلا كان ممكن أنك تبدا من اليوم بتحقيقها فابدا بلا متسنا ، هاكا التحفيز كا يتزاد شوية بشوية . أهم حاجة أنك تكون كا تختار هداكشي لي باغي أنت و ماشي لي مفروض عليك ، و أهم حاجة خاصها تكون عندك هي الإرادة و الرغبة القوية.
أي واحد باغي يحقق أهدافُ ، خاصُ يحدد نقاط الضعف و القوة الخاصة بشخصية ديالوا ، كذلك الأهداف لي غايبغي يحقق خاصهم إكونوا واقعية و يمكن تحقيقها إلا سلكنا الطريق الصحيح و ما تكونش هاذ الأهداف عالية بزاف حيث إلى فشلتي في تحقيقها غادي تحطم و ما تقدرش تكمل ، فالأهداف خاصها تكون مرنة بمعنى أنه كل ما وقع شي خلل تقدر تبدل خطة البداية و تكمل في تحقيق الهدف و مع الوقت يمكن لك تبدا تشوف شحال ديال التقدم درتي و النجاحات حققتي ، كيفما أنه ما تخليش شي واحد يدخل لك في السيرورة لي غادي بها حيث هو ما عارفش القدرات ديالك و المدى ديالها هادشي علاش خاص السيطرة تكون عندك أنت .
أشناهوما نصائح إنجاز عملية تحديد الأهداف ؟
إتخاد قرار حازم ، هاذ القرار غادي يخلي عندك قوة الإرادة و الرغبة في الوصول .
إنجاز قائمة فيها جميع القيم و القدرات ديالك ، و لي عارف راسك كا تمتاز بها و بارع فيها .
تحديد الأولويات لي عندك في حياتك ، هاكا كاتفادى أنك تبقا تالف وسط الأهداف لي عندك و كتكون عارف الإنتباه ديالك على أشنو غادي توجهوا .
ترتيب الأهداف ، الترتيب االزمني غادي يعونك باش تتخلص من العقبات لي ممكن تتعرض ليك ، حيث غتكون عطيتي لكل واحد المدة اللازمة ليه ، و حاول تكون دقيق في تحديد المدة الزمنية المناسبة لكل خطوة و ذلك بوضع خطة للتنفيذ ملائمة .
تعليق ورقة فيها الأهداف لي كطمح تحقق ، هاذ الورقة أيكون عندها تأثير إيجابي ، فهي أتكون بمثابة تذكير ليك كل نهار باش يبقا الهدف ديما حاضر في بالك و كل مرة تقدر تجيك شي فكرة لي تعونك على تحقيقٌ .
متابعة التقدم ، من المهم مراقبة و متابعة التقدم لي كنوصلوا ليه و كنحقوه فكل خطوة ، هاكا كتشوف راسك واش غادي في الطريق الصحيح لي حددتي في الأول .
الصدق مع النفس ، أهم حاجة أنك تكون صادق و شفاف مع راسك و تحاول ما تكذبش على راسك في مدى وصولك و عطائك ، فالكذب هو غير توهيم للنفس على شي حاجة ما كيناش ، هادشي علاش الواحد خاصُ يكون كا يتعامل مع راسُ بأمانة و صدق و اجتهاد حتى يوصل للهدف بثباث و يحقق النجاح .
