اشناهوما منصات العمل الحر؟
المنصات هما المواقع أو التطبيقات لي كايتكلفوا باللقاء ديال الباحث عن فرصة عمل و المشغل لي كيقلب على شي واحد يساعْدُو فشي مهمة. كاينين بزاف ديال المنصات لي يمكن كل واحد سواء كان مبتدئ أو عَنْدُو خبرة يلقى فيهم فرصة للعمل، و هاذ المنصات فيها لي كتهتم بجميع المجالات أو لي مختصة فشي مجال معين.
كاينين منصات عالمية لي تقدر توفر العمل لأي واحد حيث كيكونوا كيخدموا بلغة عالمية وحدة و لي هي "الإنجليزية"، و كاين منصات لي كاتقتاصر على مجال جغرافي معين (مثلا المنصات العربية) أو لي كتقتاصر على دولة وحدة.
الهدف العام ديال المنصات هو عرض المشاريع لي كيطرحوها بزاف ديال المشغلين أو عرض ملفات المترشحين لي كايبينوا فيها القدرات والخدمات لي ممكن يقدموها، وكاينين المنصات لي كيديروا الأنواع ديال العروض بجوج.
النوع الأول ديال المنصات، إلا دخلنا ليه كنلقاو فيه مجموعة ديال المشغلين لي كيقلبوا على المواهب لي تقدر تساعدهم فإنجاز العمل ديالهم لي كيطمحوا يأديوه بجودة عالية، المشغلين كيقدروا يتمثلوا ببزاف ديال الأشكال، كاينين الأفراد و كاينين الشركات، لي يمكن يكونوا حتاهوما بجميع الأحجام (العالمية، الخاصة، المبتدئة) ، بحيث مؤخرا ولينا كنسمعوا بزاف على شركات عالمية لي ولات كتهتم بالعمل الحر، سواء أنها كتلقى مواهب لي مايمكنش تلقاها فالمجال الجغرافي ديالها أو أن العمل لي كطمح ليه مكطلبش حضور جسدي، و هاذ السياسة ولاو كستافدوا منها بزاف ديال الباحثين عن عمل.
النوع الثاني هما المنصات لي كيركزوا على الباحثين عن عمل، بحيث كيوفروا ليهم زوايا رسمية فالواجهة ديال المواقع ديالهم، و كيعطيوهم الفرصة باش يعبروا و يبرهنوا على المواهب ديالهم من خلال عرض الخدمات لي يقدروا يقدموا و يشرحوها عبر أمثلة ديال مشاريع خدموا عليها من قبل، و حدا كل عرض كيقتارحوا الثمن ديال كل خدمة حسب الحجم و المدة. هاكا المشغل كيسهال عليه البحث عن الموظف لي كيناسب الطلب ديالوا.
النوع الثاث كيتمثل فالمنصات لي كتجمع الخاصيات ديال النوعين بجوج، يعني عرض مشاريع المشغلين و ملفات الباحثين عن عمل و كل واحد كتخصص ليه بلاصة فصفحات الموقع. و هاذ النوع ديال المنصات هو لي كنلقاوه بكثرة.
المنصات يمكن ليهم يتصنفوا لجوج أشكال أخرين، و لي هما: المنصات الشاملة لجميع أنواع المجالات لي يمكن لأي واحد يخدم فيهم، و مايمكنش مايلقاش فيهم بلاصتوا، حيث كاينين المشاريع من الجد بسيطة للمعقدة.
الشكل الأخر هما المنصات لي عندها تخصص معين كالتصميم و صناعة المحتوى، الكتابة و الترجمة، إدارة الأعمال.......إلخ.
كايجينا واحد التساؤل على هامش الربح ديال المنصات و شنو الإستفادة لي عندهم من هادشي. فهاذ المواقع أو المنصات من غير أنهم كيجمعوا مابين الأطراف، فأغلبيتهم كيحرصوا على أن الموقع يكون سهل الإستعمال من خلال واحد محرك البحث لي كيمكن الطرفين من البحث على داكشي لي بغاو. كيفما كيحرصوا على حماية المستعملين من المشغلين المزيفين لي هي أهم حاجة، حيث بعض المرات هاذ المشغلين كيستغلوا مجهودات شي شخص بالعمل الشاق و في الأخير ماكيعطيوهش المستحقات ديالوا، فهاذ المواقع كيقدروا يحميوا الناس فواحد الإطار قانوني لضمان راحة الطرفين.
و كذلك كيوفروا سهولة ديال التواصل ما بين المشغل أو فريق العمل مع الموظف، عن طريق واحد القنوات للتواصل داخل الموقع؛ المشغل يمكن ليه يتبع الموظف ديالوا، بحيث يقدر يتبع ساعات العمل ديالوا، يراقب الخدمة ديالوا بلاما يحتاج يتجسس عليه، و هاكا يقدر يخلصوا على كل ساعة خدمها فعليا و كايكون حتا واحد تبادل ديال آخر التحديثات فأي وقت.
المواقع باش كيسهلوا الخدمة للمستعملين فهوما كيقتارحوا حتا تطبيقات على الهواتف، هاكا كيكون الإستعمال فأي مكان أو أي وقت و هادشي كامل باش تكون الإنتاجية كبيرة و الجودة عالية.
و هاذ الخاصيات كاملة كتخلي أنه تكون عند المنصة نسبة ربح فكل مشروع كيتم الإنجاز ديالوا من خلالها.
جميع المنصات كتشبه لبعضها فالهدف، كايبقا الإختلاف فطريقة التسيير و الأفكار و المزايا و السياسة لي كتعتامدها كل وحدة. العمل فيهم كاملين يمكن يضمن لأي شخص يلقى فرصة عمل مستقلة.
