توصية عمل

كيفاش ممكن نحصل على توصية عمل من طرف المشغل ديالي ؟ كيفاش ممكن نبدا علاقة ثقة مهنية تخلي المشغل ديالي يعطيني إنطباع إيجابي عليا ؟ أشناهية المنهجية لي ممكن نتابعها باش نضمن الحصول على توصيات إيجابية ؟

بصفتك شخص خدام في العمل الحر ، فالحصول على توصية هي واحد الحاجة لي عندها أهمية قصوى باش تقدر طور راسك ، و هي جزء مهم من نشاطك و القيمة ديالها كتساوي المقابل المادي لي حصلتي عليه ، بحيث أنها هي لي أتعطيك مكانة وسط مجتمع العمل الحر و غتخلي أي واحد كيقلب على شي شخص إوظفوا يتيق فالعمل معاك إلا شاف مشغل أو مشغلين قبل منُ اعطى رأي إيجابي حول العمل لي كتقدم ، و ذلك لأنه بدون توصية مناسبة وصادقة ، تقدر تواجه صعوبة أكبر في إيجاد العمل المناسب ليك و كذلك إيجاد الشخص لي يقدر يثيق فيك و بالتالي طورالعمل ديالك .

أسس علاقة ثقة بينك وبين عميلك

إلا كنتي باغي توصيات و معارفش كيفاش تفكر حاجة وحدة مهمة و لي هي : الثقة بينك وبين عميلك ، بحيث إلا كنت باغي أن المشغل ديالك يكون راضي عليك و بالتالي يعطيك توصية و تقييم جيدين ، خاص بعدا تكون أنت والمشغل ديالك على نفس الصفحة من البداية إلى النهاية ، باش تكوْنوا علاقة مهنية شفافة وبناءة ، و هادشي من خلال إجراء مجموعة من الإجتماعات و النقاش على كل حاجة و خطوة كاتقوم بيها و المشغل ديالك باغيك ديرها ، هاكا باش تعرفوا على بعضياتكم مزيان و تعرف مستوى توقعات و تطلعات المشغل ديالك و تفهم بالضبط أشنو باغي و أشنو كيتسنا منك ، كيفما أنه يستحسن أنه كلما تقدمتي في  المهمة مثلا بنسبة ٪30 ، فحاول تخصص واحد الوقت لي تناقش فيه التقدم ديالك و طلب الرأي ديال المشغل ديالك و حاول تاخد ملاحظات و طرح أسئلة حول السيرورة ديال العمل ، هاكا باش تصحح أو تحسن الخدمة لي كدير ، و بقا دير هاكا حتا تكمل الخدمة بنسبة ٪ 100 ،   و حتا إلا ما كانش المشغل ديالك عندُ الوقت باش يحضر معاك مختلف الإجتماعات فحاول تبقا ترسل ليه بريد إلكتروني موجز فيه معلومات على كل خطوة . بهادشي غتكون ضمنتي أن المشغل ديالك خدا عليك فكرة مزيانة أنه أنت مواظب و ملتازم و قادر تقدم الخدمة بشكل منظم و كذلك أنك كتسمع للملاحظات ديالُ و كطبقها كيفما بغا بل أحسن من لي بغا .

التوصية هي كأس ذهبي لأي واحد خدام في العمل الحر . هادشي علاش خاصك ديما تتأكد من أنك تتلبي جميع توقعات العمل الخاصة و لي طلبها منك المشغل ديالك ، و تتعلم الاستماع إليه ، فإلا شافك أنك كاتخدم مزيان و كاتجتاهد غايبقا فينما تكون عند شي مهمة غادي يتاصل بيك و يقترحها عليك أو يعقد معاك عقد عمل مطول ، كيفما أنه غادي يعطيك توصية إيجابية و تقييم بخمس نجوم ( كاينين بعض مواقع العمل الحر لي كتستعمل التقييم بالتنقيط أو نظام النجوم و لي حتا هو كيلعب دور في تحسين مستوى الصفحة ديالك بحيث أن التنقيط أو نظام النجوم كيكون مثلا على خمسة أو عشرة فأنت خاصك تحاول تحصل على أعلى نقطة ممكنة أو أعلى نجمة ) .