كيفاش تناقش الموضوع ديال الزيادة في الأجرة مع العملاء ؟

سواء كان الأمر كيتعلق بأنك تخبر العميل ديالك بلي ما كاتحصلش على القيمة لي كتعادل الخدمات لي كتقدم أو أنه وليتي كتزيد بعض المهام جديدة بالإضافة للعمل الأولي لي تافقتوا عليه أو أن تكلفة المعيشة ارتفعات و التكاليف اتزادت و بالتالي فهو خاصُ يعطيك زيادة . فالزيادة كتكون شي حاجة ضرورية بعض المرات للناس ديال العمل الحر . و لكن ، طلب الزيادة من عند العملاء ديالك كيبان شوية صعيب نوعا ما .

في هاذ المقال ، غادي نقدموا لك بعض التوجيهات لي تساعدك في طلب الزيادة من العملاء ديالك :

طلب الزيادة قبل ما تضيف أكثر من الخدمة لي اتافقتوا عليها
في بعض الحالات ، كيكون مرتابط الطلب في الزيادة في الخلاص كمقابل ديال الجهود المبذولة في العمل من خلال أنك وليتي كتحسن من الجودة أو إضافات لي ولات ضرورية و لي غادي تخليك تنجز المهمة بطريقة مزيانة . فخاص العملاء يشوفوا و يلاحظوا هاذ التحسينات الدقيقة لي كتضيف للمشاريع المتفق عليها مع المراعاة ديال الزيادة من الوقت و الخبرة ديالك .
فإلا كان فعلا خاصك الزيادة باش تخدم ، فحاول تسول قبل ما تكمل العمل ، و بين للعميل ديالك التطورات الجديدة لي غادي تضيف و لي متعلقة بالزيادة و التعديل ديال السعر الجديد .

اخبر العميل ديالك بلي باغي الزيادة قبل
سواء كانت الزيادة لي باغي متعلقة بالمشروع أو مجرد جزء من المشروع ، فحاول تواصل أو تعلم العميل ديالك من قبل . لأنه العملاء كيحتاجوا وقت باش يدرسوا التأثير ديال الزيادة ديالك على الوضعية ديال الميزانية الخاص بهم .
فالوقت المناسب لطلب الزيادة يمكن يكون خلال بداية جزء جديد من المشروع ، فهادشي علاش إلا كنتي كتفكر في الزيادة ، فخاصك تعلمُ من قبل .

ركز على الزيادات الجزئية ماشي القيمات المبالغ فيها
بلاصة ما تبقى تسنى مدة طويلة و أنت كتقدم في الخدمات و عاد طلب زيادة و لي ممكن تكون كبيرة أو مبالغ فيها ، فحاول تقتارح زيادات ما بين كل فترة و فترة أي بشكل تدريجي . فإلا قمتي بتعديل الأسعار ديالك بنسبة 5٪ أو 10٪ كل شهرين أو خمسة أشهر ، فالعملاء ديالك غادي يعتادوا عليها و يمكن ليهم التخطيط ليها فكل فترة . لأنه غادي تجي صعيبة على العميل يقبل زيادة كتبلغ ٪25 أو 50٪ مرة وحدة .

بين القيمة ديال العمل
ملي تقدم طلب ديالك ، ركز على أنك تبين القيمة ديال العمل لي غادي تضيف ، فمثلا ، إلا كنتي كتقول للعملاء ديالك أن الخدمات لي كتقدم كتستحق أكثر من داكشي لي كاتخدُ كمقابل مادي كتكسبُ و أنه خاصك الزيادة ، فالعملاء يقدروا يترددوا . داكشي علاش حاول تبين أنك غادي تزيد من الخبرة لي عندك باش تضيف قيمة للعمل أو أنه مثلا خاصك تستثمر فشي برنامج و تشريه باش تستاعن بيه في الخدمة .

غالبا ما مقدمي الخدمات لي كينفذوا هاذ الاستراتيجيات باش يطلبوا الزيادة في الأسعار ديالهم ، كيحصلوا على النتائج لي باغين . إلا كنتي باغي نصائح أخرى على طرق بناء علاقة جيدة مع العملاء ديالك يمكن لك تلقاها فمدونة مواهب .