تدريس اللغات عن بعد
تدريس اللغات عن بعد ولا داير بلاصتو فعالم العمل الحر فحال جيمع أنواع الأعمال الحرة الأخرى، فهاذ المهنة الهدف ديالها هو القيام بتقديم دروس عن بعد في اللغات لشخص واحد أو مجموعة من الناس. الخدمة كمدرس عن بعد يقدر يخدمها أي شخص عند الموهبة و القابلية ديال تعليم طلاب من أجناس و ديانات و لغات و معتقدات مختلفة و كذلك تكون عندُ أهم حاجة و لي هي خلفية مهمة و واسعة متعلقة باللغة لي كيطمح يعطي فيها و يشاركها مع الناس المهتمة بتعلمها عن بعد، فإلا كانت كتوفر فيه هاذ الشروط يمكن ليه يبدا بسهولة فهاذ المجال، يكفي فقط أنه يتاجه لمنصات العمل الحر سواء المختصة في تعليم اللغات أو المنصات العامة.
باش تبدا كمدرس خاصك أولا تشوف المستوى المعرفي ديال الناس لي غادي تخدم معاهم، حيث كاينين ثلاث مستويات عامة: المبتدئين، المتوسطين، المتقدمين و لكل مستوى تحاول تخصص ليه ملف لي يمكن لك تجمع فيه مختلف الدروس لي غادي تخدم بيها مع الطالب أو الطلبة و لي ممكن تكون مكونة من صور، قصص، مقالات، حوارات، فيديوهات و حوايج أخرى لي غادي تسهل التعليم ديال اللغة.
المستوى الأول ديال الطلبة و لي هما المبتدئين، هاذ الناس ماكيكونوا عارفين والو على اللغة و كيبغيوك تبدا معاهم من الصفر، هنا خاصك تكون كتحقق واحد الشرط و لي هو تكون كتعرف تدوي بواحد اللغة لي تكون مشتركة بيناتكم و لي غالبا كتكون الإنجليزية، هاكا كتكون كتسهل التواصل بيناتكم بجوج و كتكون متأكد أنك غادي توصل ليه المعلومات الصحيحة و أنه كيفهمك أش كتقول. الطريقة لي غادي تعاونك باش تخدم مع هاذ الفئة هي دروس تعليم مستوى أول، لي متوفرة في الأنترنيت و كتكون غالبا كتهتم في البداية بتعليم الحروف و الأرقام و الكلمات البسيطة و تكوين جمل مبسطة.
المستوى الثاني و لي هما كيفما ذكرنا قبل أصحاب المستوى المتوسط، هاذ الناس كايكونوا غالبا كيعرفوا بعض الأشياء عن اللغة لي كيطمحوا أنك تقريها ليهم بطريقة معمقة، فباش تخدم معاهم يكفي أنك تقوم بمشاركة مقالات معاهم و لي متوفرة فمجموعة من المواقع المختصة، هاذ المقالات حاولوا تقراوهم مع بعضياتكم و ناقشوا كل كلمة أو عبارة أو جملة صعبة و ناقشوا كذلك قواعد الكتابة و قواعد صرف الأفعال و استعمال الروابط المناسبة ما بين الجمل و غيرها من القواعد المتعلقة بهاذيك اللغة، كيفما أنه ممكن أنك تحضر بعض الأسئلة عن الموضوع لي خدمتوا عليه و تطرحهم عليه، هاكا غتكون كتعطيه فرص للتعبير و التكلم بهاذيك اللغة.
المستوى الثالث هما المتقدمين، هاذ النوع ديال الطلبة غالبا كيكونوا كيطمحوا أنهم يحسنوا مستواهم الشفوي و يتعلموا يدويوا بطلاقة، الطريقة لي ممكن تستعمل في تعليمهم اللغة و لي هي أنك قبل كل حصة تحضر موضوع و في الحصة تحاولوا أنكم تناقشوه و تعطي للطالب فرصة في التعبير عن أفكارُ بسهولة و تصحح ليه الأخطاء اللغوية لي يقدر يدير، و كذلك الأخطاء في النطق و تعونوا على النطق الصحيح و السليم للكلمات لي عندُ فيها صعوبة.
من بين الوسائل لي يمكن ليها تساعدك فتعليم اللغات عن بعد، كنلقاوا أبسط وسيلة و لي هي "جوجل دوكس" بحيث أنه يمكن ليك تشارك معاهم بسهولة الصفحة لي فيها الدرس و يقدر يتبع معاك أشنو كتكتب و حتا هو يقدر يكتب التدخل ديالوا و هاكا كايكون واحد التواصل سلس بيناتكم. و في حالة ما كانوا عندك مجموعة من الطلبة و بغيتي أنك تنظم العمل مع كل واحد فيكفي أنك تقوم بتصميم جدول لي دير فيه الدروس لي خدمتي مع كل واحد و الدروس لي باقين ليك هكا باش مادوخش.
قبل ما تبدا في العمل في تعليم اللغات عن بعد مع واحد الشخص خاصك تعرف المستوى ديالوا و الهدف لي دفعوا أنه يتعلم اللغة واش كيوجد لشي امتحان، هواية أو تسلية، خدمة، سياحة، حيث هادشي هو لي غيعونك فتوجيه صناعة مضمون الدرس.
