تنظيم الوقت ملي نكون خدام فالعمل الحر
من بعد ماكايولي عندك واحد العدد ديال المشاريع لي كتخدم عليهم أو فقط عمل واحد لي كياخد لك وقتك كامل، كتبدا تحس بواحد الشوية ديال التعب و الملل و كتبقا غافل على راسك، حتى كتحس براسك عيتي بزاف و مابقاش عندك فين تزيد، هنا خاصك توقف و تعطي لراسك الراحة، حيث إلا ماوقفتيش مباشرة، الحاجة لكتجي من مورا هادشي هي الإستسلام، و إلا استسلمت فهنا كتكون تخليتي على الهدف الأول لي خلاك تبدا، و هادشي بسباب واحد الحاجة تافهة لي هي "عدم الراحة"، و هاذ الإستسلام تقدر تندم عليه من بعد. حيث ميدان العمل الحر يمكن ليك تلقى فيه فرص كبار و لي عندهم قيمة كبيرة و لي مغاديش تلقاهم فالعمل فالشركة. هادشي علاش خاصك تنظم وقتك، حيث هنا فين كاين التحدي الكبير، الخدمة العادية كتكون خدام فواحد المكان لي كتمشي ليه بشي وسيلة نقل أو على رجليك، و خلال العمل كتكون على اتصال مباشر مع زملاء العمل ديالك، كتكونوا موانسين، و لكن فالعمل الحر فأنت كتكون ملتازم بنفس المكان لي غالبا كيكون هو البيت، وكظل فنفس البلاصة نهار كامل، ماكتكون لا تنقلتي ولا مشيتي للخدمة ديالك و كتكون ما جلستي و ما هدرتي مع صحابك أو مجرد الزنقة و تسمع الصداع ديال السيارات أو شي حاجة أخرى لي كضيع فيها الوقت و تخليك ترتاح ذهنيا، فا هاذ الحوايج هوما ليكيخليوك تلف الوقت و لي هما نوعا ما منعادمين فالعمل الحر.
كاين بزاف ديال الأشياء لي كيخليوك تبقى ديما متمكن من راسك و قادر تبقى تعطي و طْوْر راسك للأحسن، خاصك ديما و فكل صباح دير مذكرة زمنية سواء كتابية أو فشي تطبيق على الهاتف أو الحاسوب، باش يبقاوا يوصلوك تحديثات، المهم فهاذ المذكرة غادي تكتب غاع هادوك الأشياء لي عندك و خاصك ديرهم فالنهار، و ترتبهم حسب الأهمية أو حسب الموعد الأخير لإرجاع العمل أو العرض ديالوا، و كل واحد تخصص ليه الوقت المناسب، خاص هاذ الوقت يكون منطقي باش تقدر تحتارموا من الأول حتى الآخر و متستلمش فيه.
وسط هاذ المهام لي عندك خاصك ضروري تعطي وقت لشي حاجة ترفيهية لغادي تخليك تبدل الجو، مثلا كالرياضة، اليوغا، الرقص، الطبخ، تخرج تقدى أو تمشى ..... كاين بزاف، المهم شي نشاط لي يخوي لك دماغك و يخليه كيفكر بحرية، هاكا ملي ترجع تخدم تلقا راسك ولات عندك طاقة جديدة و قادر تكمل فالعطاء ديالك.
و بما أن العمل الحر كيمتاز بالحرية، فيمكن لكل واحد يختارالوقت والمكان المناسب للعمل. ماشي ضروري تكون ديما كتخدم فنفس البلاصة، تقدر تبدل الغرفة و تمشي لشي بلاصة أخرى تخدم فيها، كيفما ممكن تخرج تخدم فشي فضاء كترتاح فيه ( مقهى، حديقة عمومية، مكتبة.....) هاكا العطاء ديالك غادي يتزاد و حتى الجودة غادي تحسن، حيث غادي تولي تشوف الأشياء من منظور آخر،كذلك كاينين الناس لكيكونوا كيرتاحوا فوقت خاص من النهار مثلا الليل، فهما كيفضلوا أنهم يخدموا فهاذ الوقت لي كيحسوا فيه بنسبة التركيز كطلع.
العمل الحر يقدر ياخد لك وقتك كامل و مايخليكش دير حوايج أخرى هاذ شي علاش خاصك تكون كتفكر تعلم حوايج جداد، دورات تكوينية فشي مجال جديد، استثمار الفلوس ديالك باش ماتكونش كتخرج كثر من لي كتدخل. و هاذوا تاهوما من بين الحوايج لي غادين يعونوك فأنك تكون منظم راسك و مسيِّر جيد لمشاريعك كمقاول ذاتي. حيث الربح الكبير من هادشي هو أنك تعلم تخدم بطريقة ذكية بأقل مجهود و مردود كبير.
