الألوان و علم النفس: اختار اللون المناسب للعلامة التجارية ديالك

علم نفس الألوان هو واحد من أهم جوانب التسويق. الألوان كتلعب دور كبير فالتأثير على مشاعر الناس و قراراتهم بخصوص شي منتوج أولا علامة تجارية. إذا شنو ماكان نشاطك التجاري فضروري أنك دير بحوث على الزبائن المستهدفين وتحدد على هاد الأساس ألوان العلامة التجارية ديالك. علم نفس الألوان غادي يعاونك باش تختار اللون المناسب ديال العلامة التجارية حسب الزبائن المستهدفين.

شنو هو علم نفس الألوان ؟

علم نفس الألوان هو دراسة على مدى تأثير الألوان على قرارت جمهورك المستهدف و تفاعلهم مع العلامة التجارية ديالك. علم نفس الألوان كيوضح كيفاش كيأثر كل لون على العواطف ديال ناس، مثلا البرتقالي كيفتح شهية للأكل، الأخضر و الأزرق كيساعدو على الهدوء و السكينة، إلخ. ولكن هاد التأثير كيختالف من شخص لآخر حسب الخلفية الثقافية ديالو و حسب عوامل أخرى لّ غادي نتطرقولها لاحقا. مثلا اللون الأحمر للعاطفة و الحب فالمجتمعات الغربية بينما كيمثل الإزدهار و النجاح فالمجتمعات الآسيوية. هادشي علاش هاد الإختلافات والعوامل ضروري تخاد بعين الإعتبار فاش كتستهدف فئة معينة فالإستراتيجية التسويقية لمشروعك و خصوصا فمرحلة إطلاق المنتج أو العلامة التجارية ديالك، إلا كانت هاد الخطوة مدروسة كن على يقين أن علامتك التجارية غدي تبقى مرسومة فأذهان الناس لمدة طويلة.

أهمية علم نفس الألوان في التسويق للعلامة التجارية ديالك

الألوان هي لّي كتعزّز الهوية ديال العلامة التجارية ديالك عند الفئة المستهدفة، هادشي علاش كايعتامد المسوّقين بشكل كبير على سيكولوجية الألوان فالخطط التسويقية ديالهم باش يأثرو على الجمهور المستهدف ويحاولو يوجهوهم باش يتاخدو قرار الشراء.

أنك تختار الألوان المناسبة لشعار علامتك التجارية كايساهم بشكل كبير فبروز العلامة التجارية ديالك بالمقارنة مع المنافسين، لأنها كتأثر على الناس و كتخلي عندهم واحد الإنطباع بخصوص العلامة التجارية و الرسالة ديالها.

بعض الإحصاء ات أكدات هاد التأثير ديال الألوان على تفاعلات الناس مع المنتوجات والعلامات التجارية. بحيث تبتات أن الإختيار ديال الألوان الصحيحة كيساهم ب 80% فسرعة التعرف على العلامة التجارية، أو وضحات كذلك أن الجماهير كتصدر حكمها بخصوص منتوج معين أو علامة تجارية معيّنة ف 90 ثانية، رقم قياسي صحيح ؟ عادي لأنه من 60% حتال 90% من هاد الأحكام سبابها الألوان المستعملة.

مثلا العلامة التجارية "فانتا" غيرات  شكل الشعار و نوع الخط بزاف ديال المرات ولكن عمرها غيرات الألوان. علاش فرأيك من 1940 عمرها تنازلات على هاديك الخلفية البرتقالية ديالها ؟

المعنى ديال كل لون فعلم النفس

البرتقالي

البرتقالي كيجذب مشاعر الحماس داكشي علاش كنلقاوه فشعارات الأندية الرياضية فحال روما و بارشلونة. كذلك فهو كيساهم فزيادة الإنتباه و عندو تأثير كبير على الشهية.

الأخضر

اللون الأخضر هو على صلة كبيرة بالمال و الطبيعة، كيفما كيرمز للنمو، الخصوبة و الصحة، و هادشي علاش كانصيبوه بزاف فشعارات الصيدليات و مراكز التجميل و التنحيف وحتى فصالات الرياضة.

الأصفر

هاد اللون المشرق كايعطي الإحساس بالسعادة وكيجذب الإنتباه بشكل كبير، هادشي علاش كايتستخدم بزاف فاللافتات التحديرية. إيكيا هي من أشهر العلامات التجارية لّي كتستخدم هاد اللون، هادشي لأنه كاينا علاقة كبيرة بين شراء الأثات و السعادة.

الأزرق 

البحر و السماء هما أول حاجة كتجي فبالك فاش كاتسمع أزرق، هاد اللون كيبعث الطمأنينة و السكون فالنفوس ديال الناس و فعالم الأعمال كايتعتابروه علامة للإستقرار. هاد اللون كايتستخدم فأغلبية الأخيان فالعلامات التجارية المتخصصة فالمجالات التقنية، فحال فيسبوك، تويتر، سامسونج و غيرهم

الأحمر 

هو اللون الأكثر إثارة و تحفيز للمشاعر و الإنفعالات، فكيسرّع من رد الفعل ديال الشخص و من اتخادو للقرارات. هادشي علاش كايتستعمل هاد اللون أكثر على الأزرار "قم بالتحميل الآن"، "أرسل طلبك"، إلخ. وكيتستعمل حتى على لافتات الخصومات (صولد). هاد اللون تبت فعاليتو ففتح الشهية و هادشي علاش أغلبية المطاعم كاتستعملو فشعارها، Mcdonald's ، KFC ، و غيرهم بزاف.

الأرجواني

هاد اللون كايجمع ما بين إثارة اللون الأحمر و هدوء اللون الأزرق، الشي لّي كايعطي إحساس بالرقي و الفخامة هادشي علاش معروف واللون الملكي. هاد اللون كايتعتابر ورقة رابحة للعلامات التجارية لّي كاتستهدف النساء و الرجال. شركة Yahoo هي من العلامات التجارية لّي ختارت هاد اللون باش يكون ف شعارها و على موقعها الإلكتروني.

الأبيض

هاد اللون كايرتابط بالصفاء و النظافة و البدايات الجديدة. ومن العلامات التجارية لّي كاتعتامدو شركة الملابس العالمية شانيل و شركة نايكي.

الأسود

كايرمز هاد اللون للغموض و الأناقة و القوة، ونقطة القوة ديالو أنه يمكنلك تجمع بينو و بين أي لون آخر. العلامة التجارية Apple هي وحدة من الشركات لّي كاتعتامدو كلون لشعارها، و حتى Adidas فمجال الرياضي و  ZARAفمجال الأزياء.

الرمادي

اللون الرمادي كايرتابط مباشرة بالتطور والتكنولوجيا،  هاد اللون كايرمز للحيادية و الإتزان و كيبعث بعض المشاعر السلبية فحال الإكتئاب.

كايتستخدم هاد اللون فالكتابة حيت مريح للعين، و عندو تأثير كبير على الألوان الأخرى لأنه كيضيف عليهم واحد التوازن من خلال المظهر ديالو المحايد.

كيفاش نختار الألوان المناسبة لعلامتي التجارية

باش تختار اللون المناسب لعلامتك التجارية لابد ليك من تحديد الهوية ديالها و الإنطباع لي بغيتي تعطي للناس من خلال التصميم ديال الشعار ديالك. هاد الخطوات غادي تعاونك باش تختار الألوان المناسبة للعلامة التجارية ديالك.

• نشئ الهوىة ديال العلامة التجارية ديالك

قبل ما تحدد ألوان شعار العلامة التجارية ديالك غادي تحتاج قبل كل شيئ لإنشاء شخصية العلامة التجارية ديالك. سوّل راسك كيفاش بغيتي يشوف الجمهور العلامة التجارية ديالك و شنو لّي غادي يخليك تتميز بالمقارنة مع المنافسين ديالك، و لّي كايشكّل هوية العلامة التجارية ديالك هو:

 جنس الفئة المستهدفة: حدد واش العلامة التجارية ديالك موجهة للنساء؟ للرجال ؟ أولا ليلهم بزوج ؟

الشخصية: هو الإنطباع لّي بغيتي تعطي للجمهور، الجدية ؟ الأناقة ؟ المرح ؟ أو غيرهم

القيمة المادية : واش منتجاتك غالية الثمن، شكون الفئة لّي تقد تشريها إلخ

السن: شنو هي الفئة العمرية ديال الشريحة المستهدفة ؟

هاد المعطيات غادي تخليك ترسم هوّية للعلامة التجارية ديالك و يختار الألوان لّي غادي تبرز هاد الهوّية.

• درس معاني الألوان

ضروري أنك تدرس المعاني ديال الألوان قبل ماتختار الألوان لّي كتناسب مع مشروعك و ماتنساش تدرس علاقتها مع ثقافة المجتمع لّي كاتنتاميلو الفئة المستهدفة لمشروعك والمناسبة لنشاطك التجاري، مثلا الصناعات الطبية كاتستعمل اللون الأزرق و فبعض الأحيان الأخضر و البرتقالي؛ الصناعات الغدائية كاتعتامد بالأكثر على الألوان الدافئة لّي كتلفت الإنتباه وكتفتح الشهية، فحال الأحمر، الأصفر. أما العلامات التجارية للأطعمة الصحية فكتختار فالغالب الأخضر؛ أما بخصوص الحلويات فغالبا ما كيوقع الإختيار على الوردي و الأزرق. أما العلامات التجارية لّي كتعمل فمجال التكنولوجيا فاللون الأزرق و الأرجواني هي لّي كاتناسبها بالأكثر.

• درس المنافسين

درس المنافسين و العلامات التجارية العالمية لّي ناجحة فالمجال ديالك وحاول تحدد الأسباب وراء اختيارها للألوان و أسباب النجاح ديالها.

• اختار اللون الأساسي للعلامة التجارية ديالك

حدد اللون لّي بغيتيه يغلب على الشعار ديال العلامة التجارية ديالك و كاتعتامد أغلبية العلامات التجارية الناجحة على لون واحد أو زوج. فكر مزيان فاللون لّي كيجسد شخصية العمل التجاري ديالك بناءًا على معاني الألوان والهوية لّي نشأتي للعلامة التجارية ديالك.

• اختار الألوان الثانوية

اختار بين 2 حتال 4 الألوان لّي كتوافق مع اللون الأساسي و لّي كتساعد على إظهار الهوية ديال العلامة التجارية ديالك أكثر، جرب مختلف الدرجات اللونية من الدرجات الخافتة حتال الدرجات اللامعة، و فنهاية كل تجربة استاعن برأي أشخاص أخرين و من الأفضل يكون كاينطابق عليهم صفات الفئة المستهدفة لمشروعك.

• مرحلة الإختبار للألوان ديال العلامة التجارية ديالك :

من بعد ما اختاريتي الألوان ديال العلامة التجارية ديالك، دابا جا الوقت باش تأكد بلّي هاد الألوان كتعكس الفكرة لّي بغيتي توصل للجمهور بخصوص العمل التجاري ديالك. و باش تتأكد من نتائج عملية الإختبار ستاعن ببعض الأدوات عبر الأنترنت لّي غادي تعاونك تختابر مدى توافق بين الألوان لّي ختاريتي فحال Contrast  Checkerو Colour Contrast Analyser

ماتنساش أن هاد الرحلة محتاجة لبزاف ديال الصبر و التروّي و بالقيام ببزاف ديال عمليات البحث و الإختبار قبل ماتأكد الإختيار ديالك، و أن أهم حاجة هي أول إنطباع كتعطي لجمهورك. لهاد السبب كانصحوك أنك تاخد الوقت فالبحث فمجال علم نفس الألوان و تدرس العلامات التجارية الناجحة فنفس المجال ديال العمل التجاري ديالك.

كيفما يمكنلك تستافد من الخبرة ديال أفضل مصممي الجرافيك على منصة مواهب أكبر سوق مغربي لبيع و شراء الخدمات عن بعد، وماتنساش تشارك معانا الألوان لي كاتفكّر فيها بخصوص العلامة التجارية ديالك فالتعليقات، كيفما كيسعدنا أننا ناقشو معك الموضوع أكثر فالتعليقات.