كيفاش نقدر نلقى مشغلين أو عملاء لي ممكن نخدم معاهم في العمل الحر ؟

باش تلقى عملاء في إطار العمل الحر حاجة كا تعتابر جوهر و أساس كل شخص مقدم خدمات ، لأنه العملاء أو أصحاب المشاريع من غير ما أنهم هما سبب تواجدك في العمل الحر فهما لي غادي يعطيوك فرصة باش تبين الخبرة و المهارات لي عندك و بالتالي كتضمن الاستمرارية في مجال العمل الحر .
هاذي بعض الخطوات لي ممكن تسهل عليك كيفاش تلقى المشغل ديالك و التعامل معاه باش تقنعوا .

عرف الهدف ديالك
قبل ما تبدأ تقلب على العملاء ديالك ، خاصك تسول راسك الأسئلة الصحيحة ، شكون هما الأشخاص أو الشركات لي تقدر تكون مهتمة بالخدمات لي كتقدم ؟ و فين تقدر تلقاهم ؟ الإجابة على هاذ الأسئلة غادي تخليك تبني استراتيجية لاكتساب عملاء جداد . من بعد ما كتحدد الهدف ديالك خاص تكون عندك استباقية في التواصل مع المشغل أو الشركة ، خاصة إلا كان قدموا طلب عرض عمل . في منصة مواهب يمكن لك تلقى مجموعة من عروض العمل في مجالات مختلفة يكفي غير أنك تتواصل مع صاحب المشروع و تقدم عرض على الخدمة لي ممكن تقدمها ليه .

قاد عرض كتبين فيه الخبرة ديالك
إلا كنتي باغي تقلب و تجذب عملاء ، فخاص يكون عندك عرض واضح فيه تشرح أشنو كدير و أشنو الخبرات لي عندك و الإنجازات السابقة ديالك و الثمن لي كتقدم بيه الخدمة و شروط العمل لي كا تقتارح ، لأن هاذي معلومات أي عميل لقى الحساب ديالك غادي يبغي يعرفهم عليك ، فأنت خاصك تكون قادر أنك تثبت أنك جيد في داكشي لي كدير ، هادشي باش تكتاسب ثقة ديال الناس لي يبغيوا يخدموا معاك .

كون استراتيجي جيد
باش تلقى عملاء ، خاص ضروري يكون عندك استراتيجية اكتساب العملاء ، أي أنك مثلا ترسل رسائل للناس لي كا يهمك العمل معاهم بحيث أنه تكون عارف أنت راسك أشنو كدير و عارف المستوى ديالك و تحاول تشرح المهارات لي عندك مزيان ، فحال مثلا أنك تكون كتقوم بإنشاء محتوى فيديو أو كتابة مقالات أو تصميم صور أو إشعارات .......، أي خاصك تكون منهجي و تخلي مهمة كسب عملاء حتى هي عمل بحد ذاتُ لي تخدم عليه حتا هو مزيان .

اعرف أكثر على العميل ديالك
إلا بدأوا العملاء كا يهتموا بالعمل معاك فهذه خطوة جيدة ، الأن كا يجي الدور ديالك في أنك تخليهم يثيقوا في العمل معاك ، و هادشي ممكن تحقوا من خلال أنك تبين ليهم الإهتمام ديالك للعمل معاهم و لي خاصُ يكون حقيقي كمثلا أنك تسولهم على تفاصيل أكثر على المشروع ديالهم و الآفاق ديالُ و كذلك على أشنو بغاوا منك تنجز بالضبط هاكا غادي يعرفوا بأنك شخص متحفز و مهتم .

اعطي اقتراحات واضحة
إلا بدا كيناقش معاك العميل ديالك عروض الأسعار ، فما تبخلش و ما تبالغش في تحديد سعر الخدمة ديالك ، فخاص يكون عندك تقدير مفصل ودقيق حول التسعير لي كا يمثل الخدمة ديالك و حتى شروط العمل لي خاصك تكون متافق مع العميل ديالك عليها ، كمدة إرجاع العمل ، فكلما كانت مدة أطول و معقولة يعني ماشي تخلي العميل ديالك يتسنى كلما خدمتي براحة . و باش طمأن العميل ديالك على اقتراحاتك و قراراتك حاول تعطي تفسيرات إضافية باش طمأن بخصوص الخدمة معاك .

استخدم نجاحات القديمة ديالك باش تبيع راسك
إلا كنتي خدمتي مع عملاء من قبل و كان عجبهم العمل معاك ، حاول تستعمل هاذ الإرضاء ديالهم لصالحك ، بحيث أنك تحاول تخلي العميل الجديد ديالك يعرفهم باش يثيق فيك أكثر.
منصة مواهب فيها بزاف ديال العملاء و أصحاب مشاريع لي مهتمين بالعمل مع مقدمي الخدمات فحالك ، يمكن لك تلقاهم من خلال عروض العمل .