شناهو التسويق الرقمي و كيفاش نولي اخصائي تسويق الرقمي في العمل الحر؟ 

تقريبا أغلبية المشاريع عندهم مواقع على الأنترنيت حيث ولا حاجة مهمة باش الوجه ديال المشروع يبان، و لكن مع الوقت حتا هاذ الوسيلة ما بقاتش كافية حيث نسب قليلة ديال الناس لي كيشوفوه، هادشي علاش بانوا أساليب جداد و لي كطور مع الوقت و الهدف ديالها توصل الفكرة ديال المشروع للمستهلكين و كتخليه ماعندوش فرصة أنه يتجاهلها، فهاذا هو التسويق الرقمي لي بالفضل ديالوا كيتسجلوا أرباح كبيرة و كيتشهروا مشاريع حديثة النمو. التسويق الرقمي أو التسويق عبر الأنترنيت هو مجموعة من الأدوات ديال التسويق لي كتعتامد على وسائط و قنوات رقمية باش يدار ترويج لشي منتج أو خدمة، و هاكا باش يتزاد عدد الزوار للموقع أو المتجر الإلكتروني و العلامة تولي معروفة و هاكا المبيعات يطلعوا.

ولكن ضروري ماخصنا نفهموا أن من الناحية الدقيقة والأكاديمية، فمفهوم التسويق الرقمي هو مفهوم أكبر من مفهوم التسويق عبر الإنترنت و ماشي نفس الحاجة هادشي علاش ماخصناش نخلطوا بيناتهم، فالتسويق الرقمي كيشمل التسويق عبر الإنترنت والتسويق من الهواتف الذكية عبر الرسائل النصية، والتسويق من خلال اللافتات الذكية لي كيكونوا فالشارع…الخ.

شناهوما أدوات و وسائل التسويق الإلكتروني؟

• رسائل في البريد الإلكتروني.

هادي واحد الأداة لي كاتعتابر من أساسيات التسويق الرقمي، فهي كتهتم بإرسال رسائل إلكترونية لمجموعة ديال الناس عبر العناوين الإلكترونية لي كيكونوا أصلا مجموعين قبل فواحد القاعدة ديال البيانات و الهدف ديالها هو الإشهار ديال منتوج أو خدمة و لكن كاينين عندها سلبياتها، بحيث أنه ماكنكونوش متأكدين واش رسالة كتوصل لناس كاملين لي استهدفنا، حيث كاينين الناس لي كايكنوا حابسين أنه توصلهم مثل هاذ الرسائل. و لكن هادشي ماكيعنيش أن هاذ الوسيلة معندهاش تأثير، فبالعكس واخة هاكاك كتبقا عندها مكانة مهمة فهاذ المجال فجلب المستهلكين.

• تحسين محركات البحث الذكية

هاذا حتاهو من الفروع ديال التسويق الرقمي و كيتسما S.E.O، و هي دراسة لكلمات المفاتيح لي يمكن ليها تربط الطرفين صاحب المشروع و المستهلك. و الهدف ديالها هو أن أصحاب المنتوج أو الخدمة يحطوا راسهم في الأماكن الأولى في النتلئج لي كيطلعوا في محرك البحث، و كذلك يحسنوا المكانة ديالهم في صفحات الويب باش تطلع في الصفحة الأولى فمحرك GOOGLE. و هاكا كيكونوا ضمنوا أنهم يطلعوا فنتائج البحث الأولى ديال طلبات مستخدمي الإنترنيت.

• الروابط التجارية

هاذ الروابط كتعتابر حتا هي من أشكال تسويق عبر محركات البحث، و كتعني النشرعن طريق الروابط الخارجية و لي هي عبارة عن حملات إعلانية ترويجية فبلايص فيها المستهلكين بكثرة، فحال مثلا تطلع فاليوتيوب، الإنستغرام، الفيسبوك و غيرها من مواقع سواء لي كتهتم بالتواصل الإجتماعي أو  لي كتهتم بحاجة أخرى. و كيكون الشكل ديالها نص، صورة، فيديو.

• الرسائل النصية

هاذ الوسيلة يمكن لينا نوصفوها كوسيلة قديمة قبل تطور الأنترنيت، و لي كتهدف إلى إرسال رسائل نصية لمجموعة من الأرقام باش يمكن ليهم يتعرفوا على العروض الخاصة بشي منتوج أو خدمة معينة. هي را تقريبا عندها نفس المبدأ ديال الرسالات عبر البريد الإلكتروني، غير هادي أكثر ضمانة أن المتلقي غادي يشوف الرسالة.

نمو الاعمال ماشي شي حاجة ساهلة وماكيجيش بالصدفة أن المبيعات يوصلوا ل 1,000,000 درهم. كايننين بزاف ديال الأدوات و الأساليب من غير لي ذكرنا  و لي هدفها جلب عدد كبير من المستهلكين و المستعملين و اللي الهدف ديالها واحد، هادشي علاش بزاف كيخصوا ميزانية للتسويق الرقمي و لي بعض المرات يقدر يطلع أرخص إلا كانت الوسيلة المستعملة ذكية و قدرات تجدب عدد كبير من المستهلكين.

اخصائي التسويق الرقمي في العمل الحر؟ 

اخصائي التسويق الالكتروني هو واحد الشخص لي كيقوم بخطط إإستراتيجية باستخدام الادوات و الأساليب المختلفة للتسويق الرقمي عبر المواقع الإلكترونية و محركات البحث 

 من بين المهارات لي خاص يكونوا عندو: يكون كيعرف لبرامج تصميم الصور والفيديوهات فحال (فوتوشوب ) او غيرها من برامج، يكون يقدر يستعمل وسائل التواصل الإجتماعي المختلفة، معرفة أنظمة لي كتستعمل في إدارة المحتوى، امتلاك المهارات ديال التحليل وادارة المشاريع، القدرة على تنظيم الوقت ويعرف يعطي الوقت المناسب لكل مهمة مختلفة،امتلاك مهارات ديال التواصل اللفظي والكتابي