كيفاش نقدر نعرف القدرات الشخصية ديالي ؟
كل واحد منا كتكون عندُ الرغبة باش يخدم فشي خدمة معينة و لكن كيكون كيحس براسوا ما عندوش عليها معرفة كاملة ، و لكن هادشي مكيعنيش أنه ما يقدرش يخدم ، حيث ماشي ضروري خاصُ يكون عارف عليها كلشي باش ينجزها ، يكفي فقط أنه يختابر المستوى ديالُ الحالي و يحاول يطوروا . و لكن من هادشي كامل كاينا حاجة مهمة و لي غادي تعونك باش طور راسك ، و لي هي معرفة القدرات ديالك ، بحيث مثلا إلا كانت عندك قدرات على الإلقاء و التقاسم المعرفي فأنت تقدر تخدم أستاذ في مجال التعليم حيث عندك القدرة على ذلك ، غادي يكون خاصك غير تتعلم المادة أو الحاجة لي باغي تكون فيها أستاذ بالولوج للدورات التكوينية الخاصة أو الحضور لحصص فنفس المادة و لي كيقدمها أستاذ أخر ، باش تستافد من التجربة و المهارات لي عندُ ، و هذا كيبقا غير مثال بسيط من بزاف ديال الأمثلة عن المهن لي كيكونوا عندنا عليها قدرات و خاصنا غير نكتاشفوها .
فأشناهوما الطرق لي ممكن تعاونا باش نتعرفوا على القدرات ديالنا ؟
أولا ، بدا بوقت الفراغ ديالك و بالأشياء لي كدير فيه حيث فعليا هادوك هما الأشياء لي كيعجبوك ، فمثلا إلى كنتي فوقت الفراغ كتكتب مقالات ، قصص ، تقارير فهادشي كيعني أنه عندك موهبة في الكتابة و بالتالي يمكن لك تتوجه نحو هاذ المجال و تشوف عروض العمل لي كاينة و حاول تشوف لي يناسبك و غادي تقدر تعطي فيه .
ثانيا ، إلا كنتي كتمارس شي مهنة أو شي مهمة خاصة فأطلب من الناس لي خدامين معاك أو المشرفين عليك يعطيوك تقييم على راسك و ملاحظات و استشارهم على الأشياء لي كا يشوفوك ناجح فيها ، هادشي أيخليك تعرف على القدرات ديالك و تحسن أخطائك و كذلك تبدل النظرة ديالك على الأشياء لي كظن راسك بارع فيها و لكن العكس أو الأشياء لي ما كيكونش عندك علم بأنك كتقنها ، هاكا هاذ الطريقة أتخليك تعرف على المهارات ديالك و القدرات حتى هيا لي كتكون أنت نوعا ما جاهلها و ما عرفهاش ، حيث الناس الأخرين كيقدروا يشوفوا فينا شي حوايج حنا ما كنشوفوهمش فراسنا أو ما كنوعاوش بيهم .
ثالثا ، حاول تجرب أنك تخدم تحت إشراف مدرب أو مرشد مهني أو أي شخص عندُ خبرة في مجال التقييم المهني ، فهما يقدروا يساعدوك على التعرف على قدراتك و نقاط القوة ديالك و الأشياء لي كتقدر تتقنها ، و أهم حاجة يحاولوا يتعرفوا على نقاط الضعف ديالك لي كيقدروا يشكلوا لك عائق في النجاح الكامل ديال العمل ديالك ، حيث بعض المرات هاذ الحوايج لي كيعيقوا النجاح الكامل ديال شي خدمة كيشكلوا عوائق لي كيخليونا ما نكونوش حنا هما حنا ،و هاذ المدربين أو الناس لي عندهم خبرة أعطيوك إرشادات غادي تساعدك في حل هاذ العوائق لي كتعرض ليك و بالتالي أتقدر تولي شخص منفتح كايقدر يتعرف على أخطاء و كذلك يعرف كيفاش يفهم القدرات لي كيمتاز بيها و بالتالي أيولي يسعى أنه يحسن من أداء و مستواه و النمو المستمر في الخدمة ديالُ .
رابعا ، في الأنترنيت ممكن نلقاوا بزاف ديال الإختبرات لي الهدف ديالهم تحديد القدرات الشخصية و لي مصممين من طرف أخصائيين في هاذ المجال ، فهاذ الإختبارات كا يخليوك تعرف على السمات لي كتمتاز بيها الشخصية ديالك و كذلك العيوب و كيشوفو حتى التصرف ديالك أمام بعض المواقف ، هادشي كامل كا يخليهم في الأخر يعطيوا تقييم عليك و على القدرات ديالك .
