التصميم والعمل الحر

التصميم من المجالات لي ولات مطلوبة بزاف في العمل الحر، خصوصا وأن عالم الرقمنة ولاَّ مكتاسح جميع الميادين، بفضل الصورة الرقمية لي ولات كاتعطاها أهمية كبيرة. هاذ المجال فيه بزاف ديال الإختصاصات، من بينها الكرافيك، الهندسة المعمارية، الموشن (التحريك) وحتى التصوير الفوتوغرافي. وكل اختصاص كيختالف على الآخر من ناحية الصعوبة والبرامج لي كتستعمل من طرف المصمم. القيمة ديال هاذ المجال كاينة فكَونُو مطلوب بزاف فإنتاج الشعارات، الرسوم المتحركة، الكتب، المواقع أو الإشهارات.

مجال التصميم إقدر إكون هواية، كيفما كاينين الناس لي كيعتابروه كخدمة أساسية ديالهم، بحيث أنهم جمعوا موهبة الإبداع والرؤية الخاصة لي عندهم وطوروها من خلال دورات تكوينية أو أبحاث فالأنترنيت، إذن إلا كنتي مبتدئ أو باقي ما كتعرف والو و عندك رؤية ماوضحاش على شنو تقدر تعطي، فيكمن لك طور راسك و دير فحال هاذ الناس و هاكا غادي تقدر تنطالق فهاذ المجال و تبين المهارات لي عندك.

من بين الحوايج الأولى لي خاصها تكون عندك أو تقدر تخدم عليها هي العين الفنية، حيث هي لي غتخليك تشوف الأشكال والألوان وكيفاش توزعهوم بطريقة تخلي التصميم ديالك فريد من نوعُو ويكون كيحتارم قواعد و معايير التصميم بشكل صحيح. هاذ العين الفنية ماشي شي حاجة صعيبة حيث يمكن ليها تولي عند أي واحد، خاصك غير طبق ما يسمى بالتغذية البصرية.

 التغذية البصرية كتعني أنك تبقى تشوف عدد كبير من التصاميم أو الإبداعات ديال ناس آخرين باش تاخد أفكار مختلفة، ومن بعد تنتج إبداع خاص بيك. هاذ التصاميم نقدروا نلقاوهم فأي بلاصة فالشارع، فالإعلانات، فالتلفاز، كيفما كاينين بزاف ديال المواقع لي مختصة فعرض التصاميم بمختلف الأنواع و الأشكال مجانا. من بعد حاول تبدا دير بحالهم باش تكتاسب المهارات لي خاصينك، و معا الوقت تولي دير تصاميم ديالك الخاصة لي تقدر تستعملهم كوسيلة لكسب عمل، سواء أنك تحطهم فموقع خاص أو منصة من منصات العمل الحر لي غتلقا فيها بزاف ديال العروض من طرف مشغلين لي كيطمحوا أنهم يلقاوا مصمم يعاونهم، و من بين هاذ المشغلين كاينين لي كيبغيوا إعطيوا فرصة للمبتدئين، كيفما تقدر تصادف ناس لي عندهم رؤية فنية غادين إعطيوك نصائح يخليوك تشوف راسك واش غادي مزيان أولا خاصك مزال تعلم.

مايمكنش ندويو على مجال التصميم بلاما نذكرو البرامج لي كايعاونوا فالإنتاجية بجودة عالية، وليهوما متعددين وكل واحد متخصص في حاجة. البرنامج لي كايتعتابر الأساس في التصميم الدقيق هو إن دزاين، من موراه  كاين فوطوشوب، إلوسترايتر...واللائحة طويلة. هاذ البرامج تقدر تعلم ليهم بكل سهولة في الأنترنيت، عن طريق الفيديوهات، ومن الأحسن تعلم البرنامج بالنسخة الإنجليزية ديالو باش تعرف عليه كلشي، ومن بعد تزيد طور راسك بشوية بشوية ، كيفما تقدر توصل لواحد المستوى عالي بحيث أنك  تولي دير التصاميم بتقنية ثنائي أو حتى ثلاثي الأبعاد.

فمجال التصميم مجال شاسع، وكايبقا التعلم ديالو حاجة ضرورية فالوقت الراهن بحكم بزاف ديال العوامل ومتطلبات سوق الشغل الحالي.

في العمل الحر، خاصك تعرف أن السرعة و الدقة في الانجاز كايلعبو دور مهم، بحيث إيقدر مشغل يبغي تصميم واجد فساعة أو 3 ساعات، وهنا فاش خاصك تبين القدرات والمهارات ديالك من داكشي لي تعلمتي، ويلا تمكنتي من هاذ جوج ديال العوامل فراك ضمنتي أن  أي مشغل ايبغي إيخدم معاك.