خرافة “الغرافيست الشامل” - علاش الشركات باغا كلشي فواحد؟

فالعالم ديال التصميم، بزاف ديال الناس باقيين ما فاهماش شنو كيعمل "الغرافيست" بالضبط، وهاد الشي كيخلق خلط كبير ما بين المهارات، التخصصات، وحتى الأثمان. ولات الشركات كتنشر عروض شغل كيبان فيها بحال إلا باغين فريق كامل فواحد. كيسميو البوست "غرافيك ديزاينر"، ولكن كيبداو يطلبو شواهد وخبرة فالبْراندينغ، تجربة المستخدم، الموشن ديزاين، الأنيميشن، الفوتوغرافيا، 3D، وحتى المونتاج. وهاد الشي كامل… مقابل أجر قليل.

فين كاين المشكل؟

المشكل مهوش فقط فالشركات. حتى حنا كمصممين، ساهمنا فهاد الغموض. بزاف من الناس، خصوصاً الجداد فالمجال، كيتقدمو بوصف عام بحال "غرافيست"، بلا ما يوضحو واش خدام فالهُوية البصرية، أو واجهات المستخدم، أو السوشيال ميديا... هاد الغموض كيخلي الشركات تظن أن كل "غرافيست" يقدر يدير كلشي. وهنا كتجي الفكرة الغلط: “لاش نخلص 4 مصممين؟ نجيب واحد يديرهم كاملين.”

الواقع ديال التخصص

التصميم مجال واسع، وكل فرع فيه كيحتاج وقت، دراسة، وتجربة باش الواحد يبرع فيه. البراندينغ بوحدو، مثلاً، كيتطلب فهم للسوق، النفسية ديال الجمهور، والقوة ديال الرموز البصرية. واجهات المستخدم (UI) خدامة على التفاعل والوظيفة. الموشن ديزاين مجال آخر، كيتطلب حس بالحركة والإيقاع. كيفاش بغيتو واحد يتقنهم كاملين؟!

طبعاً، كاينين ناس اللي عندهم مهارات متعددة، ولكن هادو غالباً خدامين سنوات، عندهم مشاريع وفرق، وعارفين القيمة ديال خدمتهم. ماشي ناس غادي يخدمو بثمن هزيل.

شنو كيوقع فالحقيقة؟

فالغالب، الشركات كيتجرب حظها: كتوظف واحد يقول "أنا نعرف ندير كلشي"، ولكن مع الوقت كيبان أنه خدام بسطحية، لا متقن الموشن، لا UI، لا فوتو. النتيجة؟ الخدمة ما كترضيش، المشروع ما كيوصلش، وكيرجعو يقلبو من جديد.

هاد الدوّامة كتضر الجميع: كتضيع الوقت والفلوس على الشركات، وكتدمر سمعة المصممين. والأسوأ، كتخلي الأجور تنخفض، حيت الشركات ولات كتقارن كلشي بنفس الميزان.

الحل: نكونو واضحين

خاصنا كمصممين نبداو نحددو التخصص ديالنا بوضوح: واش حنا ديزاين ديال براند؟ ديال واجهات؟ ديال موشن؟ خاصنا نبنيو ملفات شخصية قوية، نعرضو فيهم المشاريع اللي فعلاً حنا كنفهمو فيها. ومن جهة أخرى، الشركات خاصها تفهم باللي الجودة كتطلب تَخصص، وماشي كلشي يمكن يندار بعجلة.

الخاتمة

التصميم ماشي سهل، وماشي “واحد يدير كلشي”. كل مجال فيه عُمق، وباش الخدمة تخرج زوينة، خاص كل تخصص يتعطاه حقه. الشركات اللي بغات تربح فالمدى الطويل، خاصها تستثمر فالمواهب الصح، وتبني فرق، ماشي تطلب المستحيل من شخص واحد. حنا كمصممين، خاصنا نوضحو شكون حنا، وندافعو على القيمة ديال خدمتنا.